Mae Claire Hughes AS wedi diolch i ddiffoddwyr tân a’r gwasanaethau brys am eu hymdrechion eithriadol wrth fynd i’r afael â thanau gwyllt ledled Gogledd Cymru, ar ôl ymweld â Chanolfan Gadwraeth Pensychnant ger Conwy a gweld drosti ei hun y difrod a achoswyd gan y tân diweddar ar Fwlch Sychnant.
Ymwelodd Claire â Phensychnant dros y penwythnos, gan deithio dros Fwlch Sychnant am y tro cyntaf ers i’r tân gwyllt ymledu ar draws y bryniau cyfagos.
Llwyddodd y ganolfan gadwraeth ei hun i ddianc rhag y tân, ond mae ardaloedd mawr o’r cynefinoedd cyfagos wedi’u difrodi’n ddifrifol. Roedd rhannau o’r tir yr effeithiwyd arno yn dal i fudlosgi wythnos ar ôl i’r tân ddechrau, ac roedd y fflamau wedi dod yn frawychus o agos at gartrefi cyfagos.
Roedd y tân ar Fwlch Sychnant yn un o nifer o ddigwyddiadau y bu’n rhaid i’r gwasanaethau brys ymateb iddynt ledled Gogledd Cymru yn ystod tywydd eithriadol o boeth a sych, gan gynnwys tân gwyllt sylweddol ym Mraichmelyn ger Bethesda.
Dywedodd Claire Hughes AS:
“Rydyn ni wedi arfer gweld tanau ar y bryniau yma, ond roedd rhywbeth yn teimlo’n wahanol am y tân hwn. Roedd gweld maint yr ardal a effeithiwyd a dwyster y tân, a gafodd ei waethygu gan y tywydd poeth a’r sychder, yn dorcalonnus.
“Roedd gweld pa mor agos y daeth y fflamau at gartrefi pobl yn frawychus. Gwnaeth ein diffoddwyr tân waith anhygoel ar Fwlch Sychnant, yn union fel y gwnaethant ym Mraichmelyn ac mewn mannau eraill ledled Gogledd Cymru.
“Does dim geiriau i fynegi ein diolch i bawb sydd wedi bod yn gweithio mewn amodau anhygoel o anodd i gadw ein cymunedau’n ddiogel. Mae hynny’n cynnwys nid yn unig y diffoddwyr tân eu hunain, ond staff yr ystafelloedd rheoli, yr heddlu, timau achub mynydd a phawb arall sydd wedi bod yn rhan o’r ymateb.”
Mae criwiau wedi parhau i ymateb i danau gwyllt mewn rhannau eraill o Gymru, gyda’r cyfnod hir o dywydd sych wedi gadael llystyfiant yn eithriadol o sych ac wedi cynyddu’r perygl y gall tanau ledaenu’n gyflym.
Dywedodd Claire fod maint a dwyster y tanau diweddar hefyd yn ein hatgoffa’n gryf o ganlyniadau hinsawdd sy’n newid i gymunedau yng Ngogledd Cymru.
Ychwanegodd:
“Mae tywydd poeth fel hyn yn digwydd yn amlach ac yn mynd yn fwy dwys. Nid rhyw fygythiad pell yw newid hinsawdd. Gallwn weld a theimlo ei effeithiau yma yng Ngogledd Cymru.
“Mae’n bygwth ein hamgylchedd naturiol a’n bioamrywiaeth, ond hefyd ein cartrefi, ein hiechyd, ein heconomi a’r lleoedd rydyn ni’n eu caru. Ar adeg pan fo lleisiau uchel yn dadlau y dylem gamu’n ôl o’n hymrwymiadau hinsawdd, mae’r hyn rydyn ni wedi’i weld yma yn ein hatgoffa unwaith eto pam na allwn fforddio mynd am yn ôl.”
Yn ystod ei hymweliad, cafodd Claire gyfle hefyd i weld arddangosfa gelf flynyddol Pensychnant ac anogodd bobl i gefnogi’r ganolfan gadwraeth. Mae’r arddangosfa ar agor ar benwythnosau tan ddiwedd mis Medi.
Dywedodd Claire:
“Mae Pensychnant yn lle arbennig iawn a byddwn yn annog pobl i ymweld os cânt y cyfle. Mae’r gerddi’n brydferth ac, fel elusen gofrestredig, mae’r ganolfan yn gwerthfawrogi cefnogaeth ymwelwyr yn fawr.”
Hyrwyddwyd gan Claire Hughes yn Nhŷ’r Cyffredin, Llundain, SW1A 0AA. Telir am y wefan hon yn annibynnol gan Claire Hughes AS, ac ni ddefnyddiwyd unrhyw arian cyhoeddus i gynhyrchu’r wefan hon.
